Basilea-Champagna


En il chantun Basilea-Champagna datti multifaras tradiziuns vivas che han savens in'impurtanza regiunala ed en il cas da l'isanza «Chienbäse» a Liestal er surregiunala. Tradiziuns vivas na vegnan dentant betg mo preschentadas en occurrenzas tradiziunalas grondas, mabain èn savens fitg impurtantas en la vita da mintgadi dals umans. Il chantun Basilea-Champagna prenda quai sco punct da referenza per sia promoziun da la cultura. La finamira è quella da mantegnair il patrimoni cultural dal chantun, da render accessibel quel e da l'intermediar ad ina gronda gruppa da la populaziun. El na differenziescha en quest connex betg per se tranter il patrimoni cultural material ed immaterial, perquai che chaussas materialas na sa laschan savens betg separar en moda raschunaivla da chaussas immaterialas. Anzi, ellas èn cumplementaras.

Ina tgira da la cultura bain etablida

La responsabladad per conservar l'ierta istoric-culturala ed istoric-natirala dal chantun han il Museum.BL ed il Post spezialisà per l'archeologia. Il Museum.BL metta in accent spezial sin la conservaziun e sin l'intermediaziun da la tessaria da bindels da saida. Malgrà che quella è svanida quasi dal tuttafatg ils onns 1920, è ella preschenta fin oz en la memoria sco in dals chapitels ils pli caracteristics da l'istorgia industriala dal chantun. En exposiziuns, en curs d'entretschar bindels ed en projects per mantegnair la posamentaria vegn contribuì activamain a render accessiblas a las proximas generaziuns betg mo las chaussas materialas, mabain er las enconuschientschas davart l'artisanadi da la tessaria da bindels da saida.

Il Post spezialisà per l'archeologia è cumpetent per segirar e per mantegnair il patrimoni archeologic, en spezial ils numerus chastels medievals dal chantun. Cun Augusta Raurica tgira ed intermediescha il chantun l'ierta da las ruinas scuvertas da la citad coloniala romana. Las producziuns etablidas al teater roman tras la promoziun da l'art e da la cultura contemporana pussibiliteschan ina simbiosa tranter il patrimoni mundial roman e la musica ed il teater contemporan.

Fassettas impurtantas dal patrimoni cultural immaterial dal chantun èn las chanzuns, la musica cun instruments da lain, la pratica dal saut popular e la lavur sin il champ musical dals numerus chors e da las uniuns da musica che furman ina scena da musica viva e multifara. Quest patrimoni cultural è derasà per part en tut la Svizra dal nordvest e sur quella ora. Cun sias vastas mesiras da promoziun per chors, per uniuns da musica e per producziuns contemporanas s'engascha il chantun fermamain per la lavur sin il champ musical en la regiun.

Ina part considerabla dal patrimoni cultural chantunal è la cultura da scriver promovida dal chantun. La Biblioteca chantunala collecziunescha ed intermediescha en moda moderna tut las publicaziuns e scrittiras da Basilea-Champagna. Per edir la cultura da scriver da Basilea-Champagna è cumpetenta la Chasa editura chantunala.

Tradiziuns localas e tradiziuns pli giuvnas

Ina isanza dal patrimoni cultural dal chantun Basilea-Champagna ch’attira il pli bler public è l'isanza «Chienbäse». La dumengia suenter la mesemna da la tschendra vegnan purtads gronds tizuns ardents («Chienbäse») ed i vegnan tratgs tras la citad var 20 chars en flommas. Questa isanza vegn visitada mintga onn da pliras 10'000 persunas.

Ils «Pfingstblütter» ad Ettingen ed il «Nünichlingler» a Ziefen èn er tradiziuns francadas localmain. Entant ch'ils «Pfingstblütter» spassegian la damaun da Tschuncaisma tras vischnanca vestgids cun frastgas da fau ed emprovan da sprizzar cun frastgas bletschas sin las visitadras e sin ils visitaders, è il «Nünichlingler» in'experientscha sensuala. La saira dals 24 da december passan tras il vitg umens vestgids en mantels e cilinders che portan stgellas.

Impurtant per tut las vischnancas da Basilea-Champagna è il di da cunfin «Banntag». Pli baud vegnivan percurrids e controllads quest di ils cunfins communals – oz daventa il di pli e pli fitg in di da festa communal per la populaziun. Er da plazzar la planta da matg è ina tradiziun fixa en passa la mesadad da las vischnancas da Basilea-Champagna.

Ultra da questas praticas francadas istoricamain ston però er vegnir numnads las plazzas da giugar da Robi en la regiun Arlesheim da Basilea-Champagna ed ils projects per midar l'utilisaziun d'areals industrials betg nizzegiads (Walzwerk a Münchenstein, arsenal a Gelterkinden). Gist quests projects per in nov diever da stabiliments permettan da crear numerus novs projects culturals ed èn francads fermamain en la regiun da Basilea.

Referenzas