Neuchâtel


Las differentas tradiziuns dal chantun Neuchâtel reflecteschan la gronda varietad geografica dal chantun che tanscha dals crests dal Giura fin a las rivas dals lais. Schebain ch'il chantun è relativamain pitschen (802,93 km2), datti en questa regiun numerus usits che cumbineschan la vita urbana e rurala, la viticultura e l'industria, ils lais e las muntognas, la moderna e las isanzas. Quai declera segiramain er la ritgezza, l'actualitad e l'energia da las set tradiziuns dal chantun Neuchâtel ch'èn vegnidas registradas en l'inventari federal da las tradiziuns vivas.

In proceder original per inventarisar


Per respectar il spiert ed il text da la convenziun da l’Unesco davart il mantegniment dal patrimoni cultural immaterial è il chantun da Neuchâtel sa decidì da registrar ses patrimoni cultural immaterial en in proceder participativ e da dar ina rolla centrala a las persunas che tgiran las tradiziuns. Per quest motiv ha il chantun er desistì da far ordavant ina glista teoretica. Quai ha permess a las persunas sezzas da sa manifestar en l'inventarisaziun. In gruppa d'experts dals museums, da las bibliotecas, da l'Universitad da Neuchâtel e dals uffizis chantunals spezialisads ha examinà las propostas inoltradas.

Quest proceder curaschus e participativ ha purtà fritgs: Da las otg propostas dal chantun èn set vegnidas integradas en l'inventari federal. Tut las propostas èn vegnidas fatgas spontanamain da las persunas che tgiran las tradiziuns, cun excepziun da la tradiziun diffusa e vastamain derasada en la populaziun da la «Torrée neuchâteloise». Per questa tradiziun n’èsi betg realistic da definir tschertas persunas u ina gruppa da persunas che tgiran la tradiziun. Uschia pon vegnir consideradas tut las tradiziuns registradas sco dretgas «tradiziuns vivas».

Tradiziuns inventarisadas e mesiras da promoziun

Il chantun e la populaziun da Neuchâtel vulevan integrar en l'inventari tradiziuns uschè differentas sco la «Torrée» ed ils pitgels da Neuchâtel. La «Torrée» è ina festa rurala da famiglia, nua ch'i vegn fatg in fieu al liber e brassà liongias e tartuffels – ils pitgels da Neuchâtel èn ina branscha prosperaivla da l'industria. Savens emblidan ins ch'il success da questa branscha ha precedì quel da l'industria d'uras. Intginas da questas isanzas han in connex politic, sco per exempel la «Marche commémorative de la Révolution neuchâteloise du 1er mars 1848» (marsch commemorativ da la revoluziun da Neuchâtel dal 1. da mars 1848) ubain la «Fête des Fontaines de Môtiers» (festa dals bigls da Môtiers). Tuttas duas occurrenzas dattan perditga d'ina ferma conscienza civica da las Neuchatelaisas e dals Neuchatelais. Autras tradiziuns perencunter han plitost in caracter da divertiment, en spezial l'ir cun patins sin il Doubs ed il dar tgeiels. Questas tradiziuns tegnan quint a medem temp da la vitalitad regiunala e da la colliaziun cun la natira. Il cortegi dal Corso Fleuri e sia relaziun cun la «Fête des Vendanges» (vendemia) da la citad da Neuchâtel illustreschan fitg bain questa maschaida subtila da differentas tradiziuns.

Intginas isanzas (festa dals bigls, Corso Fleuri, marsch commemorativ dal 1. da mars) profitan d'ina renconuschientscha simbolica da las autoritads communalas u da lur sustegn logistic.

Ulteriuras tradiziuns dal chantun Neuchâtel

Pervi dal proceder participativ ch'il chantun ha giavischà per l'inventarisaziun han ins stuì desister d'in pèr isanzas marcantas dal chantun Neuchâtel. Las persunas che tgiran las tradiziuns respectivas n'han betg pudì vegnir mobilisadas. Questas isanzas èn per exempel las spassegiadas tradiziunalas da famiglia u la «Braderie» (martgà) da La Chaux-de-Fonds, ina festa che vegn celebrada dapi ils onns 1930 mintga dus onns e ch'è naschida sut l'ensaina da la crisa economica. Sin plaun chantunal n'ha er betg pudì vegnir resguardada l'industria d'uras. Al chantun Neuchâtel pari per propi inadequat da proponer questa tradiziun dal mastergn, da las isanzas, da las tradiziuns, da la tecnica e da l'experientscha en l'industria regiunala d'uras per l'inventari federal, senza che las persunas che tgiran la tradiziun sappian quai. Questa industria è dentant vegnida integrada en il dossier interregiunal per l'industria d'uras che cumpiglia ils chantuns Genevra, Vad, Neuchâtel, Giura, Berna, Soloturn, Basilea-Champagna e Schaffusa, pia tut l'artg dal Giura da Genevra fin a Schaffusa.

Referenzas