Zug


Il chantun Zug ha ina gronda ritgezza d'usits e d'isanzas. La gronda part da las tradiziuns vivas che vegnan pratitgadas e tgiradas per part dapi tschientaners èn caracterisadas d'ina vart dal mintgadi puril-champester e da l'autra vart da la religiun catolica. Las tradiziuns vivas han ina gronda valur tant per l'identitad culturala sco er per la coesiun sociala. Ultra da quai èn ellas ina contribuziun impurtanta a l'exclusivitad ed a la dinamica da la vita culturala da noss chantun.

Glista cuminaivla dals chantuns da la Svizra centrala

Tras la ratificaziun da la Convenziun da l'UNESCO per il mantegniment dal patrimoni cultural immaterial è la Svizra s'obligada da prender mesiras per segirar e per promover quest patrimoni. L'element central è l'elavuraziun d'ina glista naziunala dal patrimoni cultural immaterial. Il chantun Zug è sa decidì d'elavurar quest project ensemen cun ils auters tschintg chantuns da la Svizra centrala Lucerna, Sutsilvania, Sursilvania, Sviz ed Uri. Quest proceder è raschunaivel perquai che la gronda part da las tradiziuns vivas impurtantas dal chantun Zug vegn er pratitgada en auters chantuns da la Svizra centrala. Marius Risi, il manader da project responsabel, ha fatg retschertgas detagliadas en la litteratura secundara ed en archivs, el ha realisà en mintga chantun lavuratoris cun expertas ed experts, ha formulà per la Conferenza dals incumbensads per la cultura dals chantuns da la Svizra centrala resp. per ina gruppa directiva naziunala propostas per las tradiziuns da la Svizra centrala che duain vegnir integradas en la glista naziunala ed el ha la finala er documentà las tradiziuns vivas.

Sin la glista naziunala che cuntegna totalmain 167 tradiziuns sa chattan trais tradiziuns che pertutgan unicamain il chantun Zug (il «Chröpfelimee», il flottar sin il Lai dad Aegeri e la cultivaziun da tschareschas), 12 tradiziuns da la Svizra centrala han in connex cun Zug (per exempel il tschaiver, la musica populara u l'exposiziun da muvel) e 9 tradiziuns naziunalas pertutgan tradiziuns vivas ch'èn d'impurtanza er a Zug (per exempel la musica instrumentala u las uniuns).

Referenzas