Fiera da Chaindon


Sparta:
Praticas socialas
Chantun:

Descripziun

La fiera da Chaindon, pli savens er numnada mo «Chaindon», è ina fiera agricula cun ina fiera da muvel che ha lieu a Reconvilier, en il Giura bernais, mintgamai l’emprim glindesdi dal mais settember. La fiera ha ses num da l’anteriur aclaun Chaindon ch’era pli baud spartì dal vitg Reconvilier. Documentada è questa fiera dapi l’emprima mesadad dal 17avel tschientaner, dentant è ella franc d’origin pli vegl. Ses renum ha «Chaindon» d’engraziar a sia fiera da chavals ch’è s’extendida en moda remartgabla ed è daventada ina da las pli impurtantas da l’Europa.

Malgrà la mecanisaziun da l’agricultura durant la segunda mesadad dal 20avel tschientaner e la spariziun da la chavallaria en l’armada svizra, è la fiera da Chaindon in eveniment da gronda impurtanza che attira mintga onn plirs dieschmillis da visitadras e visitaders tant da la regiun sco er dal rest da la Svizra e da l’exteriur. La fiera da muvel cumenza adina l’alva da l’emprim glindesdi dal mais settember, precis a las 5.30. Ils animals vegnan preschentads datiers da la scola, entant che la fiera sa splega en tut las vias dal vitg. Quest di, ch’era ditg deditgà als affars purils, è oz in impurtant di da festa e per las puras ed ils purs ina buna pussaivladad da sa scuntrar.

Gallaria d'illustraziuns

  • La fiera da Chaindon era ina da las pli grondas fieras da chavals da l’Europa (Reconvilier, a la fin dals onns 1920) © Archives de la construction moderne – EPFL, Fonds Perrochet
  • Il fotograf Jean Chausse a publitgà in cudesch ensemen cun Philippe Monnier; questa ovra, cumparida l’onn 1947 e stampada da «l’Imprimerie Robert» a Moutier, è ina da las pli bellas perditgas da la fiera da Chaindon (Reconvilier, 1947) © Mémoires d’Ici, Fonds Jean Chausse
  • L’onn da record 1944 è vegnì martgadà cun 3100 chavals e 200 arments (Reconvilier, 1947) © Mémoires d’Ici, Fonds Jean Chausse
  • La fiera da biestga manidla cumpiglia nursas, chauras, però er lieurs, giaglinas ed auters animals pitschens (Reconvilier, 1992) © Mémoires d’Ici, Fonds Enrique Cuadros
  • La vendita da rauba agricula, qua brunsinas per las vatgas, è ina part impurtanta dals stans da fiera (Reconvilier, 1992) © Mémoires d’Ici, Fonds Enrique Cuadros
  • La turta da chaschiel, vendida a l’ingiant da las scolaras e dals scolars dal vitg (Reconvilier, 1992) © Mémoires d’Ici, Fonds Enrique Cuadros
  • Oz gist tuttina sco antruras, ils chavals attiran las visitadras ed ils visitaders da Chaindon (Reconvilier, 1992) © Mémoires d’Ici, Fonds Enrique Cuadros
  • L’arrivada dals chavals sin la plazza da la staziun (Reconvilier, data nunenconuschenta) © Mémoires d’Ici, Collections

Referenzas e dossier

Publicaziuns
  • Le Lundi. Journal officiel de la foire de Chaindon. Reconvilier, 2010-

  • Michel Bourquin et al. : Reconvilier 884-1984. Reconvilier,1984

  • Charles-André Tièche : La foire de Chaindon. In: L'Hôtâ, No 6, Porrentruy, 1983, p. 3-11

  • Philippe Monnier, Jean Chausse : La foire de Chaindon. Moutier, 1947

  • Historischer Kalender oder Der hinkende Bot. Bern, 1718-

Dossier
  • Foire de Chaindon

    description détaillée Ultima modificaziun: 29.06.2018
    Dimensiun: 463 kb
    Tip: PDF