Autonomia en il center autonom per giuvenils a Bienna


Sparta:
Praticas socialas
Chantun:

Descripziun

Dapi sia creaziun vers la fin dals onns 1960 mussa il center autonom per giuvenils (Autonomes Jugendzentrum AJZ) a Bienna exemplaricamain tge che muntan autonomia e cundecisiun libra. L’AJZ è ina rait da projects socioculturals e dapi l’onn 1978 giuridicamain in’uniun. L’organ suprem è la radunanza plenara che vegn convocada en moda regulara. L’assamblea da las utilisadras e dals utilisaders s’occupa mintg’emna da las dumondas da las singulas gruppas e dals projects dal AJZ. Las sedutas èn publicas, funcziunan normalmain en moda democratica da basa e tenor consens. Gruppas d’activitad (sco l’alloschi d’urgenza «Sleep-In» ubain la scola da circus «Zircologik») organiseschan lur projects independentamain e per part en atgnas localitads. Las gruppas da lavur exequeschan las lavurs necessarias per il manaschi, sco per exempel l’organisaziun d’occurrenzas en il «Gaskessel», l’edifizi principal dal AJZ. Cun in dumber annual da 70 000 visitadras e visitaders che vegnan nà da l’entira Svizra è la «Coupole» respectivamain il «Chessu» daventà il center da cultura il pli impurtant da la regiun.

L’AJZ a Bienna guarda – sco in dals paucs spazis libers socioculturals – enavos sin bunamain tschuncanta onns istorgia. Igl era ed è anc adina in lieu, nua ch’ins po decider sez e nua ch’ins po realisar ideas, senza restricziuns tras convenziuns e reglas socialas, schebain ch’igl existan cunfins fixads internamain. Il lieu è avert per tuts che vulan participar e cundecider: la cumposiziun dal collectiv sa mida trasor, las valurs e la savida da projects vegnan transmessas cuntinuadamain. Uschia ha l’AJZ caracterisà pliras generaziuns en la regiun da Bienna: sco lieu d’inscunter da las alternativas e dals alternativs ubain sco lieu, nua che artistas ed artists, nunconformistas e nunconformists e blers auters han chattà in spazi liber per la realisaziun da sasez. La tradiziun dal AJZ represchenta l’autonomia, la toleranza visavi subculturas e gruppas marginalas sco er l’avertadad per novas chaussas.

Gallaria d'illustraziuns

  • Demonstraziun per in center autonom per giuvenils a Bienna (ils onns 1970) © Archiv AJZ/fotograf nunenconuschent
  • Transfurmaziun dal «Gaskessel» en l’AJZ (1974) © Archiv AJZ/fotograf nunenconuschent
  • Pender enturn e sa revegnir durant las lavurs da renovaziun (1974) © Archiv AJZ/fotograf nunenconuschent
  • Emprema occurrenza en la «Coupole» renovada (matg 1975) © Archiv AJZ/fotograf nunenconuschent
  • Placat d’invit ad ina radunanza plenara (1976) © Archiv AJZ/fotograf nunenconuschent
  • Radunanza plenara en l’AJZ (ils onns 1970) © Archiv AJZ/fotograf nunenconuschent
  • Annunzia da mort ch’è cumparida a chaschun da la creaziun da l’uniun AJZ l’onn 1978 © Archiv AJZ/fotograf nunenconuschent
  • Campagna da votaziun per la renovaziun dal «Chessu» – durant las emnas d’acziun ha l’orchester da sinfonia da Bienna concertà per la renovaziun dal «Chessu» (1993) © Archiv AJZ/fotograf nunenconuschent
  • 8avel slam da poesia (Poetry Slam) en la «Coupole» (6-11-2010) © Archiv AJZ/fotograf nunenconuschent
  • L’etichetta da la biera dal «Chessu» © Archiv AJZ
  • Radunanza plenara davart il manaschi (1981) © Archiv AJZ/fotograf nunenconuschent
  • In dals jams legendars da hip hop ch’ha attratg a partir dals onns 1984/85 giuvenils da l’entira Europa © Archiv AJZ/fotograf nunenconuschent
  • Concerts suenter la renovaziun (a la fin dals onns 1990) © Archiv AJZ/fotograf nunenconuschent
  • La «Coupole» (2007) © Archiv AJZ/fotograf nunenconuschent
  • Scola da circus «Zircologik» il di da las portas avertas (2015) © Archiv AJZ/fotograf nunenconuschent
  • Radunanza plenara davart la renovaziun (16-6-2017) © Archiv AJZ/fotograf nunenconuschent

Documents da video

«Die Bieler Jugend bewegt», Film zur Geschichte der Anfänge des AJZ Biel-Bienne, 1968–1980 © AJZ-Archiv

Referenzas e dossier

Publicaziuns
  • Renato Maurer, Damian Bugmann: Die Geschichte des AJZ Biel, Band 1: 1968-1981. Biel, 2008.

  • Renato Maurer: Die Geschichte des AJZ Biel, Band 2: 1981-1995 (im Druck)

  • Renato Maurer: 40 ans la Coupole - Autonomes Jugendzentrum Biel. Das älteste AJZ der Schweiz feiert 40 Jahre Betrieb und schon bald 50 Jahre Geschichte. In: Bieler Jahrbuch 2015. Biel, 2016. p. 173-177

  • Yves Niederhäuser: Beat-Soirées und Sit-ins: Popmusik und das AJZ im Biel der 1960er Jahre. In: Bernhard C. Schär et al. (Ed.): Bern 68. Lokalgeschichte eines globalen Aufbruchs - Ereignisse und Erinnerungen. Baden, 2008, p. 57-73

Dossier