Chlefele


Sparta:
Arts figurativs
Chantun:

Descripziun

«Chlefelis» èn plattinas da lain dir tagliadas e muladas giu che han ina encrennada dad ina vart. Dus u trais «chlefelis» vegnan serrads tranter la detta dad in maun e laschads resunar tras moviments cun schlantsch. Cun muventar las plattinas endretg resunan ritmus da marsch e da saut sonors. Anc avant tschient onns para la pratica da quest simpel instrument da percussiun d’esser stada derasada pli u main fitg en tut las regiuns da la Svizra. En ils territoris catolics da la Svizra Centrala pratitgavan ils uffants ed ils giuvenils il «chlefele» oravant tut durant il temp da curaisma. Els preschentavan lur abilitads ritmicas sin via a scola ubain a chaschun da cortegis tras ils vitgs.

Durant ils onns suenter la guerra è l’usit svanì bunamain dapertut ed è vegnì pratitgà mo pli individualmain ubain en il rom da singulas occurrenzas folcloristicas – cun excepziun dal chantun Sviz. Qua ha il «chlefele» pudì sa mantegnair en vasts circuls da la populaziun, perquai ch’i èn vegnidas prendidas ils onns 1960 e 2000 mesiras efficazias per tgirar quest usit. Surtut grazia a l’introducziun dals «Priis-Chlefelen» a Sviz, en il Muotathal ed a Steinen è la tradiziun restada viva. A quests eveniments cumpetitivs, che han lieu mintgamai intgins dis avant venderdi sontg, prendan part mintga onn totalmain passa 400 uffants. Uschia disponan las scolaras ed ils scolars durant il temp da curaisma d’in repertori bain exercità che vegn alura er adina puspè sunà ad hoc sin las plazzas da scola ed en las streglias. Cun l’uniun «s’Chlefele läbt» exista ina purtadra activa da l’usit. Intginas gruppas da musica populara fan diever da «chlefelis» sco instruments d’accumpagnament, però senza avair ina impurtanza pli gronda en questa domena.

Gallaria d'illustraziuns

  • Chlefelis or dal lavuratori da l’entagliader da chlefelis Robert Kessler a Sviz © Robert Kessler, Schwyz
  • Uffants da scola en las streglias da Sviz. Cun lur chlefelis èn els en gir durant il temp da curaisma (2006) © Ernst Immoos, Morschach
  • Concert d’ina gruppa da trais chlefleras al Priis-Chlefelen a Sviz (2015) © Ernst Immoos, Morschach
  • Chleflera en acziun al Priis-Chlefelen a Sviz (2015)© Ernst Immoos, Morschach
  • Trais soras al Priis-Chlefelen a Steinen (2015) © Ernst Immoos, Morschach
  • Tschintg chlefleras al Priis-Chlefelen a Steinen, 2014 © Ernst Immoos, Morschach
  • Trais chlefleras en costums al Priis-Chlefelen en il Muotathal (2012) © Ernst Immoos, Morschach
  • Chleflera en acziun al Priis-Chlefelen en il Muotathal (2013) © Ernst Immoos, Morschach

Referenzas e dossier

Publicaziuns
  • Karl Imfeld: «Chlefälä». In: Karl Imfeld: Volksbräuche und Volkskultur in Obwalden. Kriens, 2006, p. 76-77

  • Meinrad Inglin: Werner Amberg - die Geschichte seiner Jugend. Zürich, 1949

  • K.E.: Kleffeli oder Schweizer Kastagnetten. In: Die Schweiz, 1897, p. 553

  • Albert Schmid: Chlefeli. Instrumente zur Fastenzeit. Schwyzer Hefte 1. Schwyz, 1973

  • Hans Steinegger: Chlefelen. In: Josef Wiget und Hans Steinegger: Feste und Bräuche im Kanton Schwyz. Schwyz, 1989, p. 20-21

  • Hans Steinegger: Volkskultur - Bräuche, Feste und Traditionen. In: Geschichte des Kantons Schwyz, Band 6. Zürich, 2012, p. 153-154

Dossier
  • Chlefele

    Ausführliche Beschreibung Ultima modificaziun: 20.06.2018
    Dimensiun: 312 kb
    Tip: PDF